MetroFM; Governu liuhusi Ministériu Transporte no Komunikasaun (MTK) Diresaun Nasionál Infraestrutura Komunikasaun (DNIK) servisu hamutuk ho Sekretária Estadu Komunikasaun Sosiál (SEKOMS) Diresaun Nasionál Dezenvolvimentu Média (DNDM) sei oferese liña internet gratuita ba rádiu komunidade sira hamutuk sanulu resin ualu (18).
Pesoál DNIK António da Silva Gomes ba rádiu MetroFM tersa feira (23/09/2025) ne’e hateten, objetivu atividade vizita ba rádiu komunidade sira atu instala liña internet tanba servisu hamutuk ho SEKOMS hodi fasilita rádiu komunidade sira.
“Objetivu ami nian servisu hamutuk ho SEKOMS ami mai haree hela fatin iha rádiu komunidade Aileu nian no rádiu komunidade sira seluk oinsá hatan liña internet ba rádiu komunidade sira tanba tuir SEKOMS nia hakarak rádiu komunidade tomak sei uza liña internet husi Ministériu Transporte no Komunikasaun ami mai survey fatin ne’e hodi dada liña internet”, hateten António.
Enkuantu jestora rádiu komunidade Aileu Maria Guterres Faria agradese nafatin ba SEKOMS liuhusi MTK bele fornese liña internet gratuita ba rádiu komunidade hodi fasilita servisu divulgasaun informasaun ba komunidade sira.
“Agradese tebes ba servisu ne’e tanba bele fasilita ami husi internet no ami bele fahe informasaun ba komunidade sira liuhusi plataforma dijitál ne’ebé iha hanesan online, website bele fasilita informasaun ba komunidade sira di’ak liu tan ba futuru”, afirma jestora RaKom Aileu.
Daudaun ne’e ekipa konjunta tun direta iha terenu hodi identifika fatin ba Optical Distribution Point (ODP) box fiber optica distánsia mai rádiu komunidade sira inklui rin ba eletrisidade hodi dada fiu ba iha rádiu komunidade sira.
Ekipa konjunta ne’e halo survey ona ba rádiu komunidade sira hahú iha loron 14 to’o loron 26 fulan setembru tinan ne’e.
Entertantu, rádiu komunidade sira ne’ebé la inklui iha survey ne’e mak hanesan Rakom Laklubar, Atauro no Balibo, nune’e ekipa finaliza ona hein de’it instalasaun liña internet no tuir informasaun MTK sei fornese liña internet ho velosidade megabite (MB) haat. *
Hakerek testu : Vasco-Elidio
Editora : Ana
Fonte Notísia : https://metrofm.tl/rakom-18-sei-hetan-lina-internet-gratuita-husi-mtk/
Leave a Reply